Iṣẹ́ loògùn ìṣẹ́

Iṣẹ́ loògùn ìṣẹ́ jẹ́ ọ̀kan lára àwọn ewì tí J.F Ọdúnjọ kọ.

Ewì iṣẹ́ loògùn ìṣẹ́

Iṣẹ́ lòògùn ìṣe, múra síṣẹ́ ọ̀rẹ́ mi,

Bí a kò rẹ́ni fẹ̀yìn tì,

Bí ọ̀lẹ là á rí,

Bí a kò rẹ́ni gbẹ́kẹ̀lé,

A tẹra mọ́ṣẹ́ ẹni,

Ìyá rẹ le lówó lọ́wọ́,

Bàbá rẹ̀ sì lè ni ẹṣin léèkàn,

Bí o bá gbójú lé wọn,

O tẹ́ tán ni mo sọ fún ọ,

Ohun tí a kò bá jìyà fún,

Ṣé kì í lè tọ́jọ́,

Ohun tí a bá fara ṣiṣẹ́ fún,

Ni ń pẹ́ lọ́wọ́ ẹni.

Apá lará, ìgúnpá ni ìyekan,

Bí ayé bá ń fẹ́ ọ lónìí,

Bí o bá lówó lọ́wọ́,

Ni wọn á máa fẹ́ ọ lọ́la,

Tàbí o wà ní ipò àtàtà,

Ayé á yẹ́ ọ sí tẹ̀rín-tẹ̀rín,

Jẹ́kí o di ẹni tí ń ráágó,

Kí o rí bí ayé tí ń ṣímú sí ọ.

Ẹ̀kọ́ sì tún ń sọni dọ̀gá,

Múra kí o kọ́ ọ dáradára,

Bí o sì rí ọ̀pọ̀ ènìyàn,

Tí wọ́n ń fi ẹ̀kọ́ ṣe ẹ̀rín rí,

Ṣọ́ra kí o má fara wé wọn;

Ìyà ń bọ̀ fún ọmọ tí kò gbọ́n,

Ẹkún ń bẹ fún ọmọ tí ń sá kiri,

Má fi òwúrọ̀ ṣeré ọrẹ mi,

Múra sí iṣẹ́ ọjọ́ ń lọ.