Àjẹsára ibà jẹ̀dọ̀jẹ̀dọ̀ A

Àjẹsára ibà jẹ̀dọ̀jẹ̀dọ̀ A jẹ́ àjẹsára tó má a n dènà ibà jẹ̀dọ̀jẹ̀dọ̀ A. A má a ṣiṣẹ́ lára iye àwọn ènìyàn tó fẹ́rẹ̀ tó 95% nínú àwọn tó gbàá, agbára rẹ̀ a sì má a wà fún ìgbà tó tó, ó kéré jù, ọdún mẹ́ẹ̀dógún, tó bá sì ṣeé ṣe, jálẹ̀ ìgbé-ayé ènìyàn. Bí a bá fifúnni, ìwọ̀n egbògi náà méjì ni a dámọ̀ràn, bẹ̀rẹ̀ láti ìgbà tí ènìyàn bá ti ju ọmọ ọdún kan lọ. À n fúnni gẹ́gẹ́ bí abẹ́rẹ́ tí a gún sínú ẹran ara.

Àjẹsára ibà jẹ̀dọ̀jẹ̀dọ̀ A

Àjọ Ìlera Àgbáyé (WHO) gba ni nímọ̀ràn láti fún gbogbo ènìyàn tí n gbé agbègbè ibití àrùn náà ti wọ́pọ̀ díẹ̀ ní àjẹsára náà. Níbití àrùn náà ti wọ́pọ̀ púpọ̀, a kò gbani nímọ̀ràn láti fún àwọn ènìyàn ní àjẹsára náà nítorí tí gbogbo ènìyàn ibẹ̀ a má a sábà ní agbára àti kojú àrùn náà nípasẹ̀ àkóràn àrùn náà tí wọ́n ti ní nígbàtí wọ́n jẹ́ ọmọdé. Ilé-iṣẹ́ fún Ìṣàkóso àti Ìdènà Àrùn (CDC) gba ni nímọ̀ràn láti fún àwọn àgbàlagbà tó wà lábẹ́ ewu nlá láti ní àrùn náà, àti gbogbo àwọn ọmọdé, ní àjẹsára náà.

Àtúnbọ̀tàn tó ní ipá kò fi bẹ́ẹ̀ wọ́pọ̀. Ìnira ní ojú ibi àbẹ́rẹ́ náà a má a wáyé lára àwọn ọmọdé tó tó 15% àti lára ìdajì nínú àwọn tó gbàá. Púpọ̀ lára àwọn àjẹsára ibà jẹ̀dọ̀jẹ̀dọ̀ A ni wọ́n ní kòkòrò afàìsàn àìlèfojúrí tí a ti pa nínú, bẹ́ẹ̀ sì ni àwọn díẹ̀ mìíràn ní kòkòrò afàìsàn náà ti a ti sọ di aláìlágbára nínú. Àwọn tó ní kòkòrò afàìsàn náà ti a ti sọ di aláìlágbára nínú ni a kò gbani nímọ̀ràn láti fún aboyún tàbí àwọn tí agbára àti kojú àìsàn wọn kò bá múnádóko. Díẹ̀ lára àwọn àgbéjáde egbògi yìí jẹ́ àdàlù àjẹsára ibà jẹ̀dọ̀jẹ̀dọ̀ A pẹ̀lú àjẹsára ibà jẹ̀dọ̀jẹ̀dọ̀ B tàbí àjẹsára ibà pọ́njú-pọ́ntọ̀.

A fọwọ́sí àjẹsára ibà jẹ̀dọ̀jẹ̀dọ̀ A ní ilẹ̀ Yúróòpù ní ọdún 1991, àti ní ilẹ Amẹ́ríkà ní ọdún 1995. Ó wà lórí Àkójọ Àwọn Egbògi Kòṣeémáàní ti Àjọ Ìlera Àgbáyé, àwọn òògùn tó ṣe pàtàkì jùlọ tí a nílò fún ètò ìlera ìbẹ̀rẹ̀pẹ̀pẹ̀ yòówù. Ní ilẹ̀ Amẹ́ríkà iye owó rẹ̀ jẹ́ láàárín 50 sí 100 USD.